Monday, May 16

आज भैरहवा एअरपोर्टमा ठूलो जहाज झार्दा यस्तो भयो

April 29, 2022 1433

निकै ठूलो तयारी र प्रचारवाजीसहित आज भैरहवास्थित नवनिर्मित गौतमबुद्ध अन्तर्राष्ट्रिय विमानस्थलमा नेपाल वायुसेवा निगमको वाइडबडी जहाजले अवतरण र उडान गरेको छ । तर पहिलो गाँसमै ढुंगा भनेझैँ उक्त जहाजले गलत दिशाबाट अवतरण गर्दा ठूलै समस्या आएको हो ।

पर्यटनमन्त्रीको नेतृत्वमा दुई सय ६७ जना यात्रु बोकेर काठमाडौंबाट उडेको उक्त विमान गोधुली साँझमा भैरहवा पुगेको हो । आकाशमा रहेको विमान र एअर ट्राफिक कन्ट्रोलबीच भएको मिसकम्युनिकेशनका कारण विमानले गलत दिशाबाट अवतरण गरेको बताइएको छ । कतिपयले टावरमा समस्या भएको उल्लेख गरेका छन् ।

निगमको वाइड बडी जहाजले गलत दिशाबाट ल्याण्ड गर्दा ठूलो विमान घुम्न नसकेर एक घण्टासम्म यात्रुहरु जहाजभित्रै थुनिएका थिए । कर्मचारीतन्त्र र नेभिगेशन अर्थात आकाशमा रहेको विमान र टावरको एटीसी अफिसरबीच सम्पर्कमा भएको गलत संवादका कारण त्यस्तो भएको पाइलटहरुको भनाइ छ । टावरले काम गरेन भन्ने कुरोको प्रसंगमा स्रोतले क्यालिब्रेशन फ्लाइट सफल भएको भन्दै पन्छिएको छ ।

आज २ सय ६७ जना यात्रु बोकेर काठमाडौंबाट गएको टोलीमा ५१ जना पत्रकार थिए । टावरवालाले प्राविधिक गल्ती भने पनि साँझ भैरहवा विमानस्थल वरिपरि तनावपूर्ण अवस्था उत्पन्न भएको थियो । निर्वाचन आचारसंहिताको कारण पर्यटनमन्त्री चुपचाप बसेको बताइन्छ ।

दिउँसो ३ बजे हुने भनिएको परीक्षण उडान साँझ साढे ६ बजेमात्र सम्भव भएको थियो । आजको परीक्षण उडानमा भएको कमिकमजोरीका कारण काठमाडौं भैरहवाको रुट यतिबेलासम्म पनि गडबड छ । काठमाडौंबाट भैरहवा जाने साँझ ६ बजेदेखिका उडान रोकिएका छन् ।

नेपाल वायुसेवाका वाइडबडी विमान गलत दिशाबाट अवतरण गरेका कारण एम्बुलेन्स दौडादौड गरेको थियो । पर्यटन व्यवसायी, व्यापारीलगायत रहेको टोलीमा मन्त्री विमानबाट अन्तिममा झरेका हुन् ।

आज साँझको घटनापछि नागरिक उड्डयन मन्त्रालयका पदाधिकारीहरु पनि कालोनीलो भएका छन् । अवतरण गरेको जहाज तान्नुपर्ने अवस्थामा पुगेपछि उनीहरु कालोनीलो भएका हुन् ।

रन वेको अन्तमा रहेको जहाज घुम्ने टर्निङ प्याड सानो भएकाले जहाजलाई बल्लबल्ल फर्काइएको थियो । डोमेस्टिकको जहाज घुम्ने ठाउँमा ठूलो जहाजलाई ठाउँ नपुगेपछि त्यस्तो भएको हो । पछि बल्ल बल्ल मोडिएको थियो ।

अँध्यारो हुन लागेकाले रनवेमा त्यहाँका एअरपोर्टका हाकिमको हाइलक्स गाडीले सिग्नल देखाएर प्लेन अघि बढेको थियो । इन्टरनेशनल रन वेमा उडानको समयमा कुनै पनि सवारी साधनहरु गुडाउन नमिल्ने प्रावधानलाई आज पहिलो दिन मिचिएको छ ।

नागरिक उड्डयन प्राधिकरणका अधिकारीहरुले जहाज र रनवेमा समस्या नभएको बताएका छन् । डोमेस्टिक फ्लाइटमा रहेका जहाजहरु अवतरण गर्ने पश्चिमतर्फबाट ठूलो विमान आएकाले समस्या भएको बताइन्छ । त्यसो हुनुमा टावरको सही निर्देशन पाइलटले नपाएकाले भएको हो ।

त्यहाँ बनाइएको नयाँ विमानस्थलमा इस्ट र वेस्ट अर्थात पूर्व र पश्चिमको मार्ग तय गरिएको छ । इस्टबाट ल्याण्ड गर्नुपर्नेमा वेस्टबाट ल्याण्ड गरेकाले समस्या भएको हो । पूर्वतर्फ टर्निङ प्याड सानो भएकाले रनवेमा प्लेन एक घण्टा अड्किएको हो ।

पूर्वबाट अवतरण गर्नुपर्ने जहाज पश्चिमबाट गरेपछि उक्त समस्या आएको भन्दै अधिकारीहरु पन्छिएका छन् । तर, आजको परीक्षण उडानको गलत मेसेज विश्वभर फैलिसकेको छ ।
टावर र क्याप्टेनबीच कम्युनिकेशन अभावका कारण रनवेको पूर्वतर्फ रहेको टु एट अर्थात २८ र पश्चिमतर्फ रहेको वान जेरो .१० एप्रोचलाई गलत ढंगले प्रयोग गरिँदा दुर्घटना हुनसक्ने सम्भावना हुन्छ । टु एटबाट ल्याण्ड गर्नुर्ने वाइडबडी जहाज वान जिरोबाट गराइँदा नयाँ विमानस्थलको परीक्षण उडानको बारे गलत सन्देश प्रवाह भएको बताइन्छ । जन आस्था बाट

Comment